Սա մեկ օրվա, մեկ մարդու, մեկ ուժի պայքար չէ․ «Հրապարակ»

«Հրապարակ» թերթը գրում է․

«Դիմադրության շարժման սկիզբը հայտարարած «Հայաստան» դաշինքը նոյեմբերի 9-ից հետո զանգվածային միջոցառումներ չի նախաձեռնել, փողոցային պայքարի դուրս չի գալիս։ Դաշինքից հայտնել են, որ  նոյեմբերի 22-ից սկսած, ամեն օր՝ ժամը 17:00-20:00-ն քաղաքացիները կարող են այցելել իրենց գրասենյակներ եւ կամավորագրվել։

«Մենք կտեղեկացնենք Դիմադրության շարժման հետագա ծրագրերի մասին, կլսենք դրանց վերաբերյալ ձեր առաջարկները: Սա մեկ ժամվա, մեկ օրվա, մեկ մարդու, մեկ ուժի պայքար չէ, սա ուժերի համախմբում եւ համակարգված աշխատանք պահանջող պայքար է»,- նշել են դաշինքից։ Դաշինքում, այսպես կոչված, «գույքագրման» աշխատանքներ են իրականացվում, ուզում են հասկանալ, թե ինչ ունեն՝ ե՛ւ մարդկային, ե՛ւ ֆինանսական ռեսուրսների առումով, որպեսզի գծեն պայքարի նոր սցենար։

Դաշինքում հասկացել են, որ հունիսի 20-ից հետո ինչպես իշխանության, այնպես էլ ընդդիմության նկատմամբ հիասթափությունը մեծացել է, ուստի պետք է «կշռել» ունեցածը, հատուկ տեխնոլոգիաներ կիրառել ու մեկ անգամ, բայց վճռական պայքարի դուրս գալ։ Իսկ թե դա մոտավորապես ինչ ժամկետներ է ենթադրում, թերթի աղբյուրը հայտնել է՝ «շատ սպասեցնել չենք տա, նոր տարուց հետո ակտիվ գործողություններ կլինեն»։

Մանրամասն՝ թերթի այսօրվա համարում։