top of page

Պատմական շրջադարձ․ Պուտինը ճանաչեց Դոնեցկն ու Լուգանսկը



Ռուսաստանի նախագահ Վլադիմիր Պուտինը երեկ ուշ երեկոյան ստորագրել է Դոնբասի երկու ինքնահռչակ հանրապետությունների անկախությունը ճանաչելու հրամանագրերը: Պուտինը և Դոնբասի երկու հանրապետությունների ղեկավարները կնքել են բարեկամության, համագործակցության և փոխադարձ օգնության համաձայնագրեր:

Ռուսաստանի նախագահ Վլադիմիր Պուտինը բանակին կարգադրել է մտնել Ուկրաինայի Լուգանսկի և Դոնեցկի շրջաններում ռուսամետ վարչակազմերի հսկողության տակ գտնվող տարածքներ, որոնք Մոսկվայի կողմից փետրվարի 21-ի երեկոյան ճանաչվել են որպես ինքնիշխան երկրներ:


Պուտինի հրամանով ռուսական զորքը Դոնեցկի և Լուգանսկի ժողովրդական հանրապետություններում խաղաղություն ապահովելու առաքելություն է կատարելու: Պուտինը շարունակում է «ռուսական հողերի միավորման», քաղաքականությունը, որի գաղափարական հիմքերը ձևակերպել է դեռ 15 տարի առաջ Մյունխենի հայտնի ելույթում։

Հիմա պահը հարմար է. միաբևեռ աշխարհին փոխարինելու է գալիս միջազգային հարաբերությունների բազմաբևեռությունը ու Պուտինը համարում է, որ Ռուսաստանը վերցնում է իր «բաժինը»: Ժամանակը ցույց կտա, թե դա ինչ կտա ռուսական կայսրությանը։


Սկզբունքային է մնում այլ հարց։

Զորքերի կուտակումը ու պատերազմի սպառնալիքը քողածածկույթ էին Դոնբասն ու Լուգանսկը ճանաչելու համա՞ր, թե՞ դրանց ճանաչումն է քողածածկույթի օպերացիա` Ուկրաինայում գործող վարչակարգի փոփոխության համար։

Այս հարցերն առաջիկա օրերին կստանան իրենց պատասխանները։


Հիմա ավելի կարևոր է այն իրավիճակը, որում հայտնվել է Հայաստանը, որի արտաքին քաղաքական մանևրի հնարավորությունը՝ Պուտինի հայտնի հրամանագրերից հետո, ավելի սահմանափակվել են։ Հայաստանը կարո՞ղ է Մոսկվային համոզել, որ նպատակահարմար չէ Երևանի կողմից Դոնեցկի ու Լուգանսկի հանրապետությունների ճանաչումը։


Վահրամ Բագրատյան

Comments


1/465

LATEST NEWS​​

bottom of page