Մեգան Մարքլը կարող է դատարանում հայտնվել բռնաբարության մեջ մեղադրվող արքայազն Էնդրյուի դեմ

Արքայազն Հարիի կնոջը՝ Մեգան Մարքլին, կարող են որպես վկա կանչել ամերիկյան դատարան եւ պարտադրել ցուցմունք տալ Մեծ Բրիտանիայի Եղիսաբեթ Երկրորդ թագուհու միջնեկ որդու՝ արքայազն Էնդրյուի դեմ, հաղորդում է The Daily Beast-ը:

Վիրջինիա Ջեֆրին պնդում է, որ թագավորական ընտանիքի անդամի կողմից բռնության զոհ է դարձել։ Կնոջ փաստաբան Դեւիդ Բոյսը պարբերականին տված հարցազրույցում բացատրել է, որ Մեգան Մարքլը կարող է կանչվել ցուցմունք տալու մի շարք պատճառներով: Նրա խոսքով՝ սասեքսի դքսուհին՝ արքայազն Հարիի կինը, մոտ է շփվել ամուսնու հորեղբոր՝ արքայազն Էնդրյուի հետ եւ «կարող է տեսած լինել այն, ինչ նա արել է» եւ կարող է «կարեւոր ինֆորմացիայի տիրապետել»։ Նա նաեւ այն մարդն է, ում վրա կարելի է հույս դնել, որ նա «ճշմարտությունը կասի»։ Փաստաբանը չի հստակեցրել, թե ինչ են ուզում լսել Մեգանից, որը փաստաբանի նշած իրադարձությունների պահին, թագավորական ընտանիքի անդամ դեռ չի եղել:

Բոյսը նաեւ ասել է, որ արքայազն Հարին տեսականորեն կարող է նաեւ «հասանելի լինել ցուցմունք տալու համար», քանի որ ապրում է Միացյալ Նահանգներում եւ ենթարկվում է ԱՄՆ դատարանների իրավասությանը։ Սակայն, դժվար թե նրան ներգրավեն այդ գործին։ Նրա կնոջ մասին իրավաբանները դեռ վերջնական որոշման չեն եկել։