Իսրայելը հրթիռակոծել է Սիրիայի Լաթաքիա նավահանգիստը

Սիրիական SANA պետական լրատվամիջոցը այսօր հաղորդեց, որ Իսրայելը հրթիռակոծել է Սիրիայի Լաթաքիա նավահանգիստը։ Հրթիռները հարվածել են նավահանգստի բեռնափոխադրումների հատվածին, որտեղ գտնվում են պահեստներն ու կոնտեյներները։

Սիրիայի պաշտպանության նախարարությունը հաղորդում է, որ «իսրայելական ագրեսիան նյութական վնասներ է պատճառել»։

Այս դեկտեմբերի ընթացքում սա Իսրայելի երկրորդ հարձակումն է Միջերկրականի ափին գտնվող Սիրիայի գլխավոր նավահանգստի վրա։

Իսրայելը հաճախ է հարձակումներ գործում Սիրիայի վրա, պնդելով, որ հարվածում է իրանական կամ Իրանի աջակցությունը վայելող թիրախներին։