top of page

Արևմտյան երկրները հայտարարեցին Ռուսաստանի դեմ պատժամիջոցների մասին


Երեկ արևմտյան երկրները հայտարարեցին Ռուսաստանի դեմ պատժամիջոցների մասին՝ Մոսկվայի կողմից Դոնեցկի և Լուգանսկի ինքնահռչակ հանրապետությունների անկախության ճանաչումից հետո:


ԱՄՆ-ի, Մեծ Բրիտանիայի և Եվրամիության պատժամիջոցները վերաբերում են ինչպես ռուսական ֆինանսական կառույցներին և ընկերություններին, այնպես էլ ֆիզիկական անձանց:


Ըստ արևմտյան երկրների՝ սա պատժամիջոցների առաջին փուլն է: Մեծ Բրիտանիան, ԵՄ-ը և ԱՄՆ-ը դիտարկում են դրանց խստացումը, եթե իրավիճակը ուկրաինական ուղղությամբ վատթարանա։


Միացյալ Նահանգների նախագահ Ջո Բայդենը, երեքշաբթի օրը ելույթ ունենալով Սպիտակ տանը, հայտարարեց, որ իր երկիրը նոր պատժամիջոցներ է սահմանում Ռուսաստանի Դաշնության դեմ և կխստացնի դրանք՝ կախված Ուկրաինայի դեմ Մոսկվայի գործողություններից։


ԵՄ դիվանագիտության ղեկավար Ժոզեպ Բորելը Փարիզում ԵՄ խորհրդի արտակարգ նիստին հաջորդած մամուլի ասուլիսում ասել է, որ մասնակիցները միաձայն որոշում են կայացրել ընդունել Ռուսաստանի Դաշնության դեմ պատժամիջոցների փաթեթ։ «24 ժամ հետո մենք արագ արձագանքեցինք՝ ցույց տալով մեր վճռականությունը, մենք միաձայն որոշեցինք ընդունել պատժամիջոցների փաթեթը, որը վնաս կհասցնի Ռուսաստանին, շատ մեծ վնաս», - հայտարարել է նա։


Բորելի խոսքով՝ նոր փաթեթը ներառում է պատժամիջոցներ Դոնբասի անկախության օգտին քվեարկած Պետդումայի 351 պատգամավորների նկատմամբ։ Բացի այդ, Եվրամիությունը «սև ցուցակում» է ներառել 27 ֆիզիկական և իրավաբանական անձանց, այդ թվում՝ բանկեր և կազմակերպություններ, որոնք ֆինանսավորում են Ռուսաստանի գործունեությունը Դոնբասում:


Կանադայի վարչապետ Ջասթին Թրյուդոն ևս հայտարարել է Ռուսաստանի դեմ պատժամիջոցների կիրառման մասին: Նրա խոսքով՝ իր կառավարությունն արգելք կսահմանի անջատողական անկլավների հետ ցանկացած տեսակի ֆինանսական գործարքների վրա:

Comentários


1/465

LATEST NEWS​​

bottom of page