«Ես վստահ եմ, որ գործողություններ կլինեն». Մհեր Գրիգորյանը՝ ադրբեջանցի մարդասպանին ՌԴ կողմից ազատ արձակելու մասին

Ես վստահ եմ, որ գործողություններ կլինեն, բայց հիմա չեմ ուզում ավելի մանրամասն խոսել, որովհետեւ այնուամենայնիվ, հարցի հետ կապված նաեւ կոլեգիալ քննարկում պետք է լինի: Այս մասին, այսօր՝ փետրվարի 22-ին, լրագրողների հետ զրույցում նշեց փոխվարչապետ Մհեր Գրիգորյանը՝ անդրադառնալով նրան, որ նախօրեին Ռուսաստանը նախ ձերբակալեց, ապա ազատ արձակեց ադրբեջանցուն, որի նկատմամբ Հայաստանը հետռախուզում է հայտարարել Հադրութում հայ ծերունուն գլխատելու համար, եւ այժն նա արդեն Բաքվում է:

Հարցին՝ արդյոք լինելու է բողոքի նոտա Ռուսաստանին, նա արձագանքեց. «Եկեք առաջ չընկնենք, երբ կլինի պաշտոնական արձագանքը, այդ ժամանակ էլ կխոսենք»:

Հիշեցնենք, որ Զեյնալլին ձերբակալվել էր փետրվարի 20-ի երեկոյան օդանավակայանում՝ Մոսկվա-Բաքու չվերթ բարձրանալուց առաջ։ Նա հայտնել է, ձերբակալությունը կատարվել է հայկական կողմի պահանջի հիման վրա։

Ավելի ուշ Ադրբեջանի ԱԳՆ-ն հայտարարեց, որ հարցը «Ռուսաստանում Ադրբեջանի դեսպանատան հսկողության տակ է»։

Նրա փաստաբան Ալեքփեր Գարաևը նշել է, որ Հայաստանը լուրջ մեղադրանքներով հետախուզում էր հայտարարել Քամիլ Զեյնալիի նկատմամբ, սակայն ռուսական պետությունը «հումանիզմ» է դրսևորել։

«Ադրբեջանական պետության օգնության և համառության շնորհիվ Քամիլ Զեյնալլին ազատության մեջ է և այսօր կվերադառնա Ադրբեջան»,- ասել էր Ալեքփեր Գարաևը։

Հայաստանի ներքին գործերի նախարարությունը հայտարարել է, որ Ադրբեջանի քաղաքացի Քամիլ Զեյնալլի նկատմամբ միջազգային հետախուզում է հայտարարվել «սպանություն» հոդվածի հատկանիշներով: Հաղորդվում է, որ ֆիթնես մարզիչը կասկածվում է 44-օրյա պատերազմի ժամանակ տարեց Լեռնային Ղարաբաղի տարեց բնակչին գլխատելու մեջ։

Այսօր նրան Բաքվի օդանավակայանում դիմավորել են ծաղիկներով: